مرند اؤیکو(تورکجه حئکایه و ناغیل)
اؤیکو - حئکایه - ناغیل - story و... 
یازانلار
"بیر شهر گؤز"

یازار:ایلقار موذن زاده



 سحر چاغی یوخودان كال كیمی دوروب، گئجه‌د‌ن قالمیش قانلی پیچاغی یویاراق، گیجه‌له- گیجه‌له گئیینیب، خییاواندا اوزو آشاغی دیغیرلانیرام. بیر تاكسی‌چی اؤنومده ساخلاییر و فرمانین آرخاسیندان باشینی آشاغا ایه‌ر‌ك، منه زیلله‌نیر.
-گئتمیر‌م قارداش، دئییر‌م.
بیر آزدا دایانیب باخیر و باشینی بوللایاراق سوروب گئدیر. آرخاسی سوره ماشینا باخیرام و سوروجونون ایشینه شوبهه‌له‌نیر‌م. قاباغدان بیر قادین گلیر، اوشاغی نین الیندن یاپیشمیش، منی گؤره‌ر‌ك دیسكینیب دوداغینی دیشله‌ییب ساووشور. دؤنوب قادینا باخیرام و آددیملادیغیم یئرده قادی نین گؤستردیی تپكی منی فیكیره دالدیریر. دؤرد نفر گنج قیز بیر-بیریله دانیشیب گوله-گوله، خیاوانین اوتاییندا یئریدیك لری یئرده، منی گؤره‌ركن دایانیب شاشقینجاسینا بیر-بیرینه باخیب، باشلارینی توولاییرلار، سانكی اؤلو ییئه‌ن گؤروبلر. یاواش-یاواش اؤزومه شكّ ائدیب اوستومه باشیما باخیرام. زیپیم آچیقدیر، یوخسا باشیمین توكو بیز دایانیب؟ كؤینه‌ییمی ترسینه گئیمیشم، یوخسا شالواریمین آیاغی جورابیمدا قالیب؟
هر یولدان كئچن، هر آراباچی، توكانچی و بوتون شه‌هر منه باخیر. بیر شه‌هر گؤز داشیییرام اؤزومله بیرگه. خییاواندا یئریدییم یئرده، بدنیمه تیكیلمیش گؤزلر، قیییق كیمی سانجیلیب گؤوده‌مه.
خیالا دالیرام. دونن یاپدیغیم جینایتی دویوب مو شه‌هر؟
 شه‌هرین اورتا دؤرد یولونا یئتیشه‌ر‌ك، همه‌شه آچیق اولان قفه‌نی باغلی گؤرور‌م و بیر یازی قفه‎نین شوشه‌سینه یاپیشدیریلمیش. یازیدان هوركه‌ر‌ك، الیمده‌كی آلمانین چؤته‌لینی یاواشجاسینا آرخین ایچینه دیغیرلادیب آغزیمی سیلیر‌م.
 قفه ایفطاردان سونرا آچیلاجاق...

[ دوشنبه 9 تیر 1393 ] [ 12:41 ] [ riza ]
.: Weblog Themes By themzha :.

وئبلاگا گؤره

من یانماسام،سن یانماسان،بیز یانماساق
نئجه چیخار قارانلیقدان آیدینلیقا...
ناظم حیکمت
بو وئبلاگ اؤیکو و حئکایه اوچون بیر یاپراقدی...ناغیلار دونیاسین سئون لر بیزایله بو یاپراق دا یولداش اولا بیلرلر...
سید رضا حسینی
شهر: مرند
ایمیل: rezaaydin491@yahoo.com
Rezagord@gmail.com
فیس بوک: ‏‎www.facebook.com/marandoyku
امکانات وب