"حبیب فرشباف ایلا قیساجا تانیشلیق"

حاضیرلایان:سید رضا حسینی

حبیب فرشباف 1323- جی ایلده تبریزده  دونیایا گؤز آچمیشدیر.ایلك و اورتا مكتبینی تبریزده بیتیردیك دن سونرا 1343 –جی ایلده «سپاه دانش» پالتاریندا قاراداغ كندلرینه گئتمیش و 11 ایل بو بولگه ده موعللیملیك ائدمیشدیر.او قارداغدا ،مكتب سیز كندلره مكتب تیكیب، كیلاس قوروب ،عئلم توخومونو اكمیشدی.

حبیب فرشباف موعاصیر آذربایجان ادبیاتینین اَن گؤركم لی تمثیل چی لریندن بیری دیر.خالق روحونون گؤزل بیلیجی سی ،میللی خوصوصییت لریمیزین ماهیر صرّافی،اینسانی سجییه لر له زنگینلش میش یارادیجی شخصیت دیر.آنا دیللی شئعریمیزین،نثریمیزین،اوشاق ادبیاتیمیزین دیرلی سیمالاریندان دیر.

حبیب موعللیمین آذربایجان حئكایه ساحه سینده اؤزل بیر یئری واردی.یازیچی،حیاتدان آلینان تجروبه لرینی،یاشانتی لارینی،فلسفی –اخلاقی فیكرلرینی،حئكایه لرینین اؤزه رینه،مایاسینا چئویریر.او،كند حیاتی نی گؤزل دویور.گؤزل حیس ائدیر.كند مسئله لرینه،كند عالمینه یاخشی بلددیر.

حیبیب – ین گوجلو و دیرلی حئكایه لریندن:سولئیمان،بیر سئوگی بیر عومو،صنتكارلیق دان بویوك،قاراقیش،قوی آتلی بالاخان،هومای و ...آد آپارماق اولار.بو حئكایه لرده ،خالقیمیزین كئچمیش حیات طرزی ،او دونم ده كندلرین ایجتماعی – ایقتصادی وضییتی ایله برابر،دؤورون روحو،نفسی، ائله جه ده موعیّن بیر نسلین حیات تاریخی،صنتكاریقلا جانلانیب دیر.

حبیبین حئكایه لری جانلی خالق دیلیندن قایناقلانیر و سؤز اویونلاریندان،ایفاده بازلیقلاردان،اوزاقدیر.حبیب موعللیم حئكایه لرینی ،«ریوایت» اسلوب لارینی موختلیف چالارلاری و اوصول لاری اوزره قورور.او حئكایه لرینده موكالمیه تئز-تئز موراجعت ائدیر.چونكی بویوللا حئكایه برینین ریوایت خطّی نین ایره لی لمه سی ،ها بئله حادثه لرین آچیق لانماسینی یاخشی تامین ائده بیلیر.

حبیبین حئكایه لرینده سونلوقلار داها ماراقلی گؤرونور.بو سونلوقلار دئمك حئكایه لری  تامام لاییر.حتا حئكایه لرین عونوانینا دا بو سونلوقلار،ایشیق توتور،اونلارین معناسی نین آچیقلانماسیندا اوخوجویا كؤمك ائدیر...

*1350- جی ایل «سپاه دانش» سیرالاریندا موعللیم لیك ائدن لرین ایچینده بیرینجی لیك قازانیر.2500 ایل لیك شاه لیق بایرام لاریندا دعوت اولونور.او بایرام دا ایشتراك ائمه شرطی ایله،دانشگاهدا عالی تحصیل آلاجاغینی بیله –بیله،او تؤرن لرده ایشتراك ائتمك دن ایمتینا ائدیر.

*50- جی ایللردن ائتیبارن «موسیقی» یه هوسی داها آرتیر و آكاردیون اؤیره نیر و 5 دفترده خلق ماهنی لارینی توپلاییر. پهلوی رئژیمینین قانلی – قادالی دؤورونده ،مامورلارین قورخوسوندان بو دفترلریله،شعر،حئكایه،توپلادیقی فولكور نمونه لری و «توركه داوا» آدلانان دیردیغی موعالجه و درمان اوصولارینی، حبیب- ین یاخینلاری الیله باغدا تورپاغا قویلانیر و بیر داها تاپیلماییر!!