قوولوق

بالاجا بیر اوغلان قوولوق ساتان بیر كیشینین یانیندا دایانیب اَلوانلی قوولوقلارا حسرتله باخیردی.قوولوقلار ایسه قوش كیمی هاوایا دارتینیردی.اوغلان اوزونو ساتیجیا توتوب یاواشجا دیللندی.

- عمی،منیم بیر دنه ده قوولوقوم یوخدور!

- پولون نئجه،وارمی؟- دئیه قوولوق ساتان سوروشدو.

- یوووو...

- پولون اولاندا گلرسن،- دئیه ساتیجی اوزونو یانا چئویردی.

بیردن نئجه اولدوسا،كولك بیر نئچه قوولوقو هاوایا قالدیردی.قوولوق لار یاخینلیقداكی آغاجین بوداغینا ایلیشدی.قوولوق ساتان چاشدی.آغاجداكی قوولوقلارا باخیب اوغلانا دئدی:

- او قوولوقلاری دوشوره بیلسن،بیرینی سنه وئره رم.

اوغلان آیاق قابلارینی و كؤینه یینی چیخاریب بیر طرفه توللادی.پیشیك كیمی آغاجا دیرماشدی.قوولوقلارین بوداغا ایلیشن ساپلارینی آچدی و اونلاری دوشوردو.آمما قوولوقلاردان اَن گؤزلی بوداغین ائله یئرینه ایلیشمیشدی كی،اونا الی چاتمادی.ساتیجی دئدی:

- ساغ اول سن قوچاق اوغلانسان.

- آمما بیرینی منه وئرمه لی دینیز...!

- هه،دئیه كیشی اوسكوردو.- او آغاجدا قالان قوولوق وارها،باخ او سنیندیر.دوشوره بیلیرسنسه گؤتور آپار.

اوغلان یولون قیراغیندا اوتوردو.اوزاقلاشان قوولوق ساتانین آرخاسینجا باخیب اؤز-اؤزونه دئدی:- عیبی یوخدور،قوی بئله اولسون.آغاجا ایلیشسه ده،بیلیرم كی منیم ده بیر قوولوقوم وار...

سون

سیدرضا حسینی

زمزم سویو

حاضیرلایان:سید رضا حسینی

آذربایجان ناغیلاربندا "زمزم" سؤزونه تز- تز راست گلمك اولار.بعضی ناغیلاردا دئییللركی،آغیر یارالانمیش قهرمان زمزم سویونو ایچمكله ساپ ساغلام اولور.زمزم هچ ده یازارلارین تخیولوندن دوغماییب.حقیقتن،زمزم سویو وار و او بو گون ده كعبه یاخینلیغینداكی مسجدلردن بیرینین حیتینده یئرلشیر.هر ایل مكه یه گئدن میلیون لارلا مسلمان بو سودان ایچیر و بونونلا دا خسته لیك لردن ساغالاجاغینا اینانیر.

زمزم قویوسونون تاریخی ایسلام دان اوولكی دؤره گئدیب چیخیر.بونون حاقیندا بیر چوخ روایت لر وار.روایت لردن بیرینده دئییللركی،بیر گون ایبراهیم پیغمبرین حیات یولداشی هاجر خانیم اوغلو ایسماعیل ایله ائوده اوتورموشدو.ائله بو واخت ایبراهیم پیغمبر كدرلی حالدا ایچری گیردی.اوزونو هاجره توتوب دئدی:حاضیرلاش گئدیریك.هاجر پیغمبردن "هارا؟" دئیه سوروشماغا بئله جیسارت ائتمه دی.حاضیرلاشیب اری ایله یولا دوزلدی.او واخت ایسماعیل هله كورپه ایدی،یئنیجه ایمكله مه یه باشلامیشدی.اونلار اوجسوز بوجاقسیز بیر صحرایا گلیب چیخدیلار.ایبراهیم پیغمبر سون دفعه كدرلی باخیشلارلا اوغلونا و آروادینا باخیب گئریه دؤندو.هاجر بیلمیردی نه باش وئریر.ایبراهیم پیغمبر نه اوچون اونلاری بو صحرا دا تك قویوب گئدیر .اونلار بو صحرادا نئجه قالاجاقدیلار؟دهشتلی حیوانلاردان نئجه قوروناجاقدیلار؟نه یئییب نه ایچه جك دیلر؟هاجر اسماعیلی قیزیلی قوملارین اوستونده قویوب ایبراهیم پیغمبرین آرخاسینجا:بیزی نه اوچون بورادا قویوب گئدیرسن؟- دئیه سسلندی.پیغمبر جواب وئرمدی.

اوندا هاجر بیر داها سوروشدو:- بو ،الله هین می امریدیر؟

- الله امریدی .ایبراهیم پیغمبر جوابلادی.

-ائله ایسه الله هیم بیزی داردا قویماز، سن نیگاران قالما.

كورپه آغلاییردی.هاجر تئز گلیب اوغلونو باغرینا باسدی.بیر مدت گئچدی،اونلارین یئمه یی و سویو قورتاردی.صحرادا سوسوز قالماق اؤلومله برابردیر.هاوا چوخ ایستیدی.ایسماعیلین دوداغی سوسوزلوقدان چاتلامیشدی.چاره سیز قالان آنا صحرانی گزیب سو آختارماغا باشلادی.سو تاپماق اوچون "صفا" تپه سینه چیخدی.هچ نه تاپمایاندا قارشیداكی "مروه" تپه سینه قالخدی.بئله جه یئددی دفعه صفا و مروه تپه لری آراسیندا گئدیب گلدی.بونا گؤره دیر كی، ایندی مسلمان لار حج زیارتینه گئدنده بو تپه لر آراسیندا یئدی دفعه گزیرلر.

هاجر چوخ یورولموشدو،سوسوزلوق دا بیر یاندان اونو اوزوردو.آنجاق اوندان اساس دردی اوغلو ایسماعیل ایدی.كورپه اوشاق سوسوزلوقدان آغلاییردی.ائله بو واخت الله هین رحمی گلدی اونلارا و ملك جبراییلی گؤندردی یئر اوزونه.ایسماعیل جبراییلی گؤرن كیمی آغلاماغی اونودوب اونونلا اویناماغا باشلادی.اللری ایله اونو چاغیردی، بالاجا آیاقلارینی بیر نئچه دفعه قاینار قومون اوستونه چیرپدی.بیر دن مؤجوزه باش وئردی.بالاجا اسماعیلین آیاقلاری آلتیندان سو سیچرادی.آنا بالا دویونجا سودان ایچدیلر.سو اطرافه داغیلماسین دئیه هاجر سویون كنارینی توپراقلا باغلادی.سونرالار دئییردیلر كی ، اگر هاجر سویون اطرافینی بئله دوزلتمه سه ایدی، اوندا زمزم قویو یوخ، آخار سو اولاردی.

 سون