مرند اؤیکو(تورکجه حئکایه و ناغیل) اؤیکو - حئکایه - ناغیل - story و...
| ||
|
"ائوینیزه زنگ آچدیم" یازار:صیاد فیضی قایناق:3 آلما ائوینیزه زنگ آچدیم، ائویمیزه قارشی ائوینیزه. “آلتی آی بیرگون” قولاغیمدا جینگیلده یه-جینگیلده یه، اورهییم قورخا-قورخا او كیچیك، او اوفاجیق سئوگی یوواسینا زنگ آچدیم؛ الو، الو… تیلفون آرخاسیندا سن ایسه سوسدون، من ایسه میسدیم. گونلر اؤتدو او گونلردن، ایللر توزونا بوروندو سئوگیمیز. سئوگیمیز دیللره دوشدو، آنامین قولاغینا یئتیشدی؛ “قونشو قیزی آلانین آغزین آییر دیلین چك” سانكی دونن ایدی كوچه باشیندان بیرینجی دفه ائوینیزه زنگ آچدیغیم. آتان دستهیی قالدیردی؛ “باغیشلایین ائلهبیل یانلیش اولوب” دئدیم. اورهییم تیترهمهیه باشلادی. ائوینیزین چئورهسینده گودوكچولویه باشلادیم، آتان ائشییه چیخمامیش كوچه باشینداكی تیلفونا یومولدوم. - الو - بویورون، سسیز آلچاقدی اوجا دانیشین. - منی تانیرسان؟ - سیز؟ - من سنی… - الو، الو یئنیدن نومرهنیزی توتماغا باشلادیم؛ - الو، الو - - الو، واللاه یالان دئمیرم، من سنی… دانیشماغیما ماجال وئرمهدین. مندن كیچیك قارداشیوا اؤنجه من سالام وئرردیم، آنانی سایقیلا قارشیلاردیم. آتاوین آراباسین دونیادا اَن گؤزل آرابا ساناردیم. ائوینیزین دووارلاری سانكی منه سایخانج وئریرردی. آنام سیزین ائودن دانیشاندا وار گوجومله قولاق آساردیم. “آلتی آی بیر گون”ه گؤره دوغروسو ائویمیزدن قورخاردیم زنگ آچماغا. كوچه باشینداكی ساری بویاق تیلفوندا الیمدن یورولموشدو. قونشولاردا داها اَیری اَیری باخیردیلار، آما منیم هئچ وئجیمهده دئییلدی. اوخولوم ناهاردان سونرا اولسایدیدا هرگون ساهات یئددییه اون بئش دیقه قالان قاپینیزدا، قاپیمیزا قارشی قاپینیزداكی سئیید چؤركخاناسیندا چؤرك نووبهسینه دوراردیم. هردن آلدیغیم چؤركلری آنان آپاراردی. گئجه یوخومادا گلردین، گؤز یاشلاریمادا قاتیلاردین. من آناما، سنایسه منه شیلتاق ائدردین. سئوگیلر گونو موتلو اولسون گؤزلیم. ائوینیزه زنگ آچدیم، ائویمیزه قارشی ائوینیزه؛ - الو، الو ….. - یوخ قارداش چوخداندیر بوردان كؤچوبلر. - هارا گئدیبلر بیلمیرسن؟ - یوخ. اوووخ. قاپینیزدان كئچیرم، قاپیمیزا قارشی قاپینیزدان. یئنی تیكینتیلر تیكیلمیش، ایزلر باسدیریلمیش. قونشو آروادلاری قاپیدا. ائویمیزدن آیری كیشی چیخیر، نئجه ددهمین غئیرتینه دَیمیر. ائویمیزه اؤزگه آروادی گیریر، اولمویا ددهمین…. هلر بیزی دینلردی، اوخولا یوخولو گئدردین. ایندیسه سن یوخسان و من یوخولو یاشاییرام.گئجهلر بیزی دینلردی، اوخولا یوخولو گئدردین. ایندیسه سن یوخسان و من یوخولو یاشاییرام. من سنی…. سون [ دوشنبه 25 فروردین 1393 ] [ 08:09 ] [ riza ]
|
|
[قالب وبلاگ : تمزها] [Weblog Themes By : themzha.com] |