سخاوتلی آغاج

مئشه ده یوغون گؤوده لی قوللو – بوداقلی آلما آغاجی واردی. او ، بالاجا بیر اوغلانلا دوسلوق ائدیردی.اوغلان هر گون آغاجین یانینا گلیر ، تؤكولموش یارپاقلاری ییغیب چلنگ هؤرور ، تاج كیمی باشینا قویاراق اؤزونو مئشه نین شاهی ساییردی. او ، آغاجین گؤده سینه دیرماشیر ، بوداقلاریندا یلله نیردی.یورولاندا دا آغاجین كولگه سینده یوخویا گئدیردی.آلما آغاجی چوخ خوشبختی ایدی. آمما واخت كئچیر ، اوغلان بویویور و آلما آغاجی داها چوخ گونلرینی تكلیكده گئچیرمه لی اولوردو.

بیر دفه اوغلان آلما آغاجینین یانیا گلدی. آغاج دئدی: بورا گل، اوغلان، منیم بوداقلاریمدا یئللن، آلمالاریمدان یئه ، منیمله اوینا ، قوی بیز یئنه خوشبخت اولاق. - من آرتیق بویوموشم، آغاجلارا دیرماشماق منه یاراشماز،- دئیه اوغلان جواب وئردی.- من باشقا ایلنجه لر آرزوسوندایام. آمما بونون اوچون پول لازیمدیر. مگر سن بونو منه وئره بیلرسن؟

- من چوخ شاد اولاردیم ،- دئیه آلما آغاجی آه چكدی.- آمما منیم پولوم یوخدور. ایسته ییرسن ، آلمالاریمی در آپار شهرده سات. اوندا سنین پولون اولار سن خوشبخت اولارسان! اوغلان آغاجا دیرماشیب بوتون آلمالاری دردی و آپاردی. آلما آغاجی دوستونون ایشینه یارادیغی اوچون چوخ خوشبخت ایدی.

بوندان سونرا اوغلان خیلی مدت مئشه یه گلمدی.آلما آغاجی درد – غم ایچینده ایدی، گؤزو یوللاردا قالمیشدی.بیر گون اوغلان گلنده او ، سئوینجیدن تیتره دی.- تئز گل بورایا ، بالاجا – دئیه او سسلندی.- منیم بوداقلاریمدا یئللن ، قوی بیز یئنه خوشبخت اولاق.

- اَه من نه هایدایام ، سن نه هایدا، - دئیه اوغلان جواب وئردی.- یاشیم كئچیر ، ایسته ییرم عائیلم ، اوشاقلاریم اولسون. بونون اوچون ائو لازیمدیر، منیم سه ائویم یوخدور.سن منه ائو وئره بیلرسن؟

- من چوخ ایسته ییردیم ، دئیه آغاج كوكسونو اؤتوردو.- منیم ائویم یوخدور .آمما عوضینده ، بوداقلاریم وار.اونلاری كسیب آپار ، اؤزونه ائو  تیك و خوشبخت اول.اوغلان آلما آغاجینین ایری بوداقلارینی كسیب آپاردی و اؤزونه ائو تیكدی. آلما دا بیر مدت اؤزونو خوشبخت حیس ائدی. آیلار ، ایللر كئچدی. بیر گون یئنه دوستو گلیب چیخدی. او آرتیق یاشلی كیشیدی.آلما آغاجی سئوینجله دیللندی: گل بورا دوستوم منیله اوینا.

- بونون اوچون من چوخ یاشلیام. اویناماغا نه كئفیم وار ، نه ده حالیم. ایندی بیر قاییق دوزلدیب اوزاق – اوزاق یئرله ره سیاحته چیخماق ایسته ییرم.آمما نه ائدیم قاییغیم یوخدور.

-منیم گؤده می كس ، اوزونه قاییق دوزلت.سن او قاییقلا چوخ اوزاقلارا اوزوب ایسته یینه چاتا بیلرسن.كیشی آلما آغاجینین گؤده سینی كسدی، قاییق دوزلتدی و اوزاقلارا اوزوب گئدی.آلما آغاجی ایسه ، بونا اینانماق چتین اولسادا ، چوخ خوشبخت ایدی.

خیلی واخت كئچدی و كیشی یئنه آلما آغاجینین یانینا گلدی . اونون ساچلاری آغارمیشدی ، گوجله یئرییردی .- باغیشلا منی ، دوستوم، - دئیه آلما  آغاجی اونو گؤرجك آه چكدی ،- سنه هچ نه وئره بیلمه رم .داها آلمالاریم یوخدور.

- آلمانی نئیله ییرم؟- دئیه قوجا جواب وئردی.- منیم آغزیمدا دئمك اولار كی دیش قالماییب.

-منیم بوداقلاریم دا قالماییب ، سنی یئللندیره بیلمیه جه یم.

- بوداقلاردا یئللنمك اوچون من چوخ قوجایام.

- گؤدم ده یوخدور كی ، یوخاری دیرماشاسان.

- منیم یوخاری دیرماشماق اوچون ده چوخ قوجایام، چوخ یورولموشام.

آلما آه چكدی: - منی باغیشلا ، چوخ ایسته ییردیم كی ، سنه نه ایسه وئریم، آمما منیم هچ نییم قالماییب ، من ایندی یانلیز قوجا بیر كؤتویم.باغیشلا!

-منه ایندی هچ نه لازیم دئییل.ساكیت و راحات بیر یئر آختاریرام كی ، اوتوروب دینجه لیم. من چوخ یورولموشام.

- نینك، - دئیه آغاج جواب وئردی .- قوجا كوتوك ائله بونا داها چوخ یارایار.گل بورا دوستوم، اوتور و دینجل.قوجا بئله  ده ائتدی و آلما آغاجی یئنه ده خوشبخت ایدی.

سون